UM FLÓASKÓLA Í FLÓAHREPPI
Skólastarfið á að snúast um að koma nemendum til aukins þroska í öruggu og hvetjandi umhverfi. Allir nemendur eiga að geta nýtt skólaumhverfið til að afla sér þekkingar og færni. Öllum nemendum á að líða vel í skólanum og þeir eiga að hafa tækifæri til að auka samstarfshæfni sína og víðsýni. Þannig geta þeir á farsælan hátt tekist á við lífið í síbreytilegu samfélagi nútímans og lagt sitt af mörkum til að bæta það. Skólinn þarf einnig, sem hjarta samfélagsins, að þjóna íbúum þess með því að leggja sitt af mörkum í alls kyns viðburðum tengdum listum, íþróttum og menningu. Skólinn þarf að eiga gott samstarf við íbúana og ýta undir framþróun í samfélaginu.
Flóaskóli er svo öflugur og fýsilegur að það er trú okkar að skólinn sé aðdráttarafl sveitarfélagsins og hann er stolt þeirra sem að honum koma og hann er stolt Flóahrepps.
Skólastefna Flóahrepps
Á skólaárinu 2012-2013 var unnið að skóla- og æskulýðsstefnu fyrir Flóahrepp. Með víðtækri þátttöku starfsfólks Krakkaborgar og Flóaskóla og íbúa Flóahrepps. Skólastefnan var samþykkt á sveitarstjórnarfundi 5. júní 2013.